منہاج القرآن ویمن لیگ جنوبی پنجاب شعبہ عرفان الہدایہ کے اشتراک سے آن لائن فہم القرآن کورس کا شاندار انعقاد کیا گیا، جس کا دورانیہ 15 روز پر مشتمل تھا۔ اس کورس کا بنیادی مقصد قرآن مجید سے رجوع، اس کے فہم و تجوید کی تعلیم اور عملی زندگی میں اس کے پیغام کو نافذ کرنے کی ترغیب دینا تھا۔ کورس کی تمام کلاسز کا آغاز ہمیشہ اللہ رب العزت کے بابرکت کلام کی تلاوت اور نعتِ رسول مقبول ﷺ سے کیا گیا۔ مرکزی اسکالرز محترمہ جویریہ افضل صاحبہ اور محترمہ عائشہ بتول صاحبہ نے نہایت خوبصورت، سادہ اور مؤثر انداز میں شرکاء کو قرآن مجید کے اسباق پڑھائے۔
اس کورس میں سورۃ الکہف اور سورۃ النساء کی تلاوت، تجوید، اور بامحاورہ ترجمہ پڑھایا گیا۔ تجوید کے دس دنوں کے اسباق کی دہرائی اور عملی مشق بھی کروائی گئی تاکہ شرکاء درست قراءت کے ساتھ قرآن پڑھ سکیں۔کلاسز میں قرآن کے مختلف مضامین پر روشنی ڈالی گئی، جن میں حرمتِ انسانی، جہاد، نمازِ قصر، احسان، زوجین کے حقوق و معاملات، احکاماتِ وراثت، علاماتِ منافقین، ذکرِ حضرت عیسٰی علیہ السلام شامل ہیں۔ شرکاء کورس نے سوالات کیے جن کے جوابات قرآن و حدیث کی روشنی میں دیے گئے۔ اس سے نہ صرف ان کا فہم بڑھا بلکہ عملی زندگی میں قرآن کے نفاذ کا جذبہ بھی ابھرا۔
کورس کے اختتام پر منہاج القرآن ویمن لیگ جنوبی پنجاب کی جانب سے تمام شرکاء کو مبارکباد پیش کی گئی اور یہ پیغام دیا گیا کہ رجوع الی القرآن کے اس سلسلے کو جاری رکھیں اور اپنے علاقوں میں بھی اس طرح کے کورسز کا انعقاد کریں۔
تبصرہ