بامقصد تعلیم اور اخلاقی تربیت کے فقدان نےمقدس رشتوں کو گہنا دیا ہے
والدین گھروں کو مرکز علم و تربیت بنائیں: ممبر کوآرڈینیشن کونسل منہاج القرآن ویمن لیگ
لاہور (15 جولائی 2025) منہاج القرآن ویمن لیگ کی سنٹرل کوآرڈینیشن کونسل کی رکن لبنیٰ مشتاق نے راولپنڈی میں باپ کے ہاتھوں 16 سالہ بیٹی کے قتل کے افسوسناک واقعہ پر کہا ہے کہ با مقصدتعلیم اور اخلاقی تربیت کے فقدان نے مقدس رشتوں کو گہنا دیا ہے۔ وہ گزشتہ روز ویمن لیگ کے مشاورتی اجلاس میں اظہار خیال کر رہی تھیں۔ انہوں نے کہاکہ ڈگری زدہ ناقص نظام تعلیم اور دین سے دوری کی وجہ سے اسلام کے نام پر حاصل کئے جانے والے ملک میں لاقانونیت، لادینیت اور مادیت پھیل رہی ہے جس کی وجہ سے محترم رشتے نفرت و انتقام کی بھینٹ چڑھ رہے ہیں۔
لبنیٰ مشتاق نے کہاکہ تربیت سے خالی ہمارا نظام تعلیم یوتھ میں عدم برداشت اور فرسٹریشن پیدا کر رہا ہے۔ ان سماجی عوارض کے علاج کے لئے شیخ الاسلام ڈاکٹر محمد طاہر القادری نے گھروں کو مراکز علم و تربیت بنانے کا ویثرن دیا ہے۔ اس ویثرن کی روشنی میں تحریک منہاج القرآن ملک بھر میں 25 ہزار ماڈل مراکز علم قائم کر رہی ہے۔ یہ مراکز علم گھروں میں قائم ہوں گے جن کے پہلے رکن افراد خانہ ہوں گے۔
انہوں نے کہاکہ شیخ الاسلام ڈاکٹر طاہر القادری گزشتہ 10سال سے آئندہ نسلوں کی اخلاقی تربیت پر فوکس کئے ہوئے ہیں اور وہ والدین کوآگاہ کر رہے ہیں کہ اولاد کی ابتدائی عمر تربیت کی ہوتی ہے اسے لاڈ پیار میں ضائع مت کریں۔ والدین جس قسم کی تربیت کرتے ہیں بالغ ہونے پر انہیں اولاد کی طرف سے اسی قسم کا رسپانس ملتا ہے۔ انہوں نے کہاکہ اخلاقی قدروں کے احیا کےلئے گھروں کو مصطفویٰ تعلیم و تربیت کے مراکز میں بدلنا ہو گا۔
لبنیٰ مشتاق نے کہاکہ جب گھر کا ماحول لادینیت اور مادیت کا شکار ہوتا ہے تو اس کے منفی اثرات پوری سوسائٹی پر مرتب ہوتے ہیں اور آج ہم دیکھ رہے ہیں سوسائٹی میں قتل و غارت گری مقدس رشتوں اور اسلامی اقدار کی بے توقیری بڑھ گئی ہےاور یہ لمحہ فکریہ ہے۔ سوسائٹی کو امن، ادب و احترام کا گہوارہ بنانے کے لئے سب سے پہلے گھروں کے ماحول کو ٹھیک کرنا ہو گا۔
تبصرہ