شیخ الاسلام ڈاکٹر محمد طاہر القادری دامت برکاتہم العالیہ کا شہر اعتکاف میں ہزاروں معتکفین سے چھٹی نشست میں "صحراے عِشق میں چند عارفوں سے ملاقات" کے موضوع پر فکر انگیز خطاب
انہوں نے کہا کہ سارا تصوف اخلاق کی عمدگی کا نام ہے۔ منہاج القرآن علم و شعور کے فروغ کی تحریک ہے۔ منہاج القرآن نہ پیری مریدی کرتا ہے اور نہ ہی یہاں تصوف کے نام پر ڈھونگ ہے۔ منہاج القرآن نے علم کے مردہ کلچر کو زندہ کیا ہے۔ منہاج القرآن کو گرانے اور ختم کرنے کی بہت کوششیں ہوئیں، حضورﷺ کےنعلین پاک کے تصدق سے منہاج القرآن پاکستان سے اٹھ کر پوری دنیا میں پھیل گیا۔ ہم نے تمام تر مزاحمت کے باوجود سمندروں سے خشکی کے راستے نکالے، پہاڑوں سے ٹکرائے مگر اپنی شناخت اور اپنا وجود برقرار رکھا۔ یہ صدی منہاج القرآن کی صدی ہے۔
انہوں نے مزید کہا کہ عاشق وہ لوگ ہیں جن کے دل دنیا سے کٹ گئے اور وہ اللہ سے واصل ہوگئے اور ان کے اخلاق پاکیزہ اور عمدہ ہوگئے۔ منہاج القرآن کے وابستگان پورا زور اپنے اخلاق پر دیں اور اخلاق درست کرنے کی سب سے بہترین جگہ آپ کا گھر ہے۔ جتنا آپ کا اخلاق اپنے گھر والوں، رشتہ داروں اور عزیز و اقارب سے اچھا ہوگا معاشرے کو اتنی ہی خیر ملے گی۔
نوجوانوں کو نصیحت کرتے ہوئے انہوں نے کہا کہ جس کو اللہ سے محبت ہوجائے وہ اس کی عطاء پر خوش رہتا ہے اور ساری دنیا میں اس کی محبت میں سرگرداں رہتا ہے، سر تا پا سچائی بن جاتا ہے، جھوٹ، دجل، فریب اور دھوکہ اس کی زندگی سے دور ہوجاتا ہے، اپنے عمل، برتاؤ، فعل میں اللہ کی نافرمانی نہیں کرتا، آخرت کو دنیا پر ترجیح دیتا ہے، خیر اور بھلائی کے لیے ہر وقت کمر بستہ رہتا ہے۔
تبصرہ